Felles pressemelding fra Norway’s Best Group og Ultimate Nordic

4. november 2026 – Gjengitt i sin helhet på originalspråket.

Aurlandsskoen får nye eigarar – skal utviklast vidare

(Flåm, 4. november 2026) Etter 18 år med Norway’s best Group som eigar får Aurlandsskoen no nye eigarar. Ultimate Nordic tek over den tradisjonsrike merkevara og vil satse vidare på Aurlandsskoen som kvalitetsprodukt og etablert norsk merkevare.

Norway’s best Group tok over Aurlandsskoen i 2008, først saman med Aurland Sparebank og frå 2012 med 100 prosent eigarskap. Målet var å sikre vidare drift og ta vare på eit produkt og ein handverkstradisjon med sterke røter i Aurland. Sidan den gongen har selskapet arbeidd med å vidareføre produksjonen, utvikle merkevara og gjere historia om Aurlandsskoen kjent for nye kundegrupper.

No meiner Norway’s best at tida er inne for å sleppe nye eigarar til.

– Aurlandsskoen er ein viktig del av historia til Aurland, og det har vore viktig for oss å ta vare på og utvikle denne arven. Når vi no har funne ein aktør som både ser verdien i historia og har erfaring med å utvikle norske merkevarer, meiner vi dette er ei god løysing for Aurlandsskoen, seier konsernleiar i Norway’s best Group, Per Brochmann.

Treng nye føresetnader

Produksjon og sal av sko er ei spesialisert verksemd og ligg litt utanfor til Norway’s best Group si kjerneverksemd innan reiseliv. Samstundes har det ikkje vore mogleg å skape tilfredsstillande lønsemd i verksemda.

– Vi skal vere opne på at vi ikkje har klart å skape den lønsemda i Aurlandsskoen som vi har ønskt. Samtidig har dei 18 åra våre som eigar hatt ein verdi. Produksjonen og handverkskompetansen er halden levande, og Aurlandsskoen er framleis ei sterk merkevare med potensial. Vi meiner ein eigar med kompetanse, produksjonsmiljø og distribusjon innan dette området har betre føresetnader for å utvikle merkevara vidare, seier Brochmann.

Driftsdirektør Bent-Cato Danielsen peikar på at mange menneske har lagt ned eit stort arbeid for Aurlandsskoen gjennom desse åra.

– Aurlandsskoen ber med seg ei heilt spesiell historie og handverkstradisjon. Mange har bidrege til å halde denne levande og utvikle produktet vidare. Dei tilsette i skofabrikken blir ikkje med over til ny eigar, og vi har derfor vore svært opptatt av å finne gode løysingar for dei, seier Danielsen.

Vil utvikle Aurlandsskoen vidare

Ultimate Nordic tek over merkevara og varelageret frå 2. november.

– Vi har stor respekt for historia til Aurlandsskoen og arbeidet som er gjort for å halde tradisjonen levande. Samtidig ser vi eit betydeleg potensial i merkevara. Ambisjonen vår er å ta vare på det som gjer Aurlandsskoen unik, og samtidig utvikle produktet, produksjonen, distribusjonen og marknaden slik at fleire får kjennskap til og ønskjer å bruke Aurlandsskoen, seier dagleg leiar i Ultimate Nordic, Espen Vikanes.

For Norway’s best Group er eigarskiftet ei vidareføring av intensjonen då selskapet gjekk inn i Aurlandsskoen i 2008.

– Vi gjorde det fordi vi meinte denne historia og handverkstradisjonen var verd å ta vare på. Det meiner vi framleis. Difor er vi glade for at historia ikkje sluttar her. No er det andre som skal skrive det neste kapittelet, seier Per Brochmann.

Partane har valt å ikkje offentleggjere dei økonomiske vilkåra for transaksjonen.

For meir informasjon kontakt:

Per Brochmann
konsernleiar i NBG
per.brochmann@norwaysbest.com +47 481 88 929

Bent-Cato Danielsen
Driftsdirektør Norway’s best
bent-cato.danielsen@norwaysbest.com
tlf. 463 60 616

Pål Feiring
Prosjektansvarlig
pal.feiring@ultimatenordic.no
+47 984 39 148

Om Ultimate Nordic

Ultimate Nordic er ein norsk merkevareeigar og ein leiande nordisk distributør innan sport, friluftsliv,skofag, industri og profilmarknaden. Selskapet har røter tilbake til 1928 og har gjennom nærmare hundre år bygd omfattande kompetanse innan merkevareutvikling, produktutvikling, sourcing, salg, marknadsføring og distribusjon.

Ultimate Nordic er ein del av Dalema Gruppen, eit norsk og 100 prosent familieeigd konsern. Familieeigarskapen gir eit langsiktig perspektiv på eigarskap, investeringar og utvikling.

Ultimate Nordic representerer ei rekke sterke og internasjonalt anerkjente merkevarer i den nordiske marknaden, blant anna Stanley, CamelBak, Leatherman, Ledlenser og Crispi. Parallelt har selskapet ein betydeleg portefølje av eigeneigde merkevarer, deriblant Brusletto, Nordic Grip, Orack, Topaz, Hällmark, og Sportquip.

Ultimate Nordic har eit etablert nordisk salgs- og distribusjonsapparat, hovudkontor i Oslo og verksemd i Norge og Sverige. Selskapet arbeider mot ei rekke salgskanalar og har kompetanse og infrastruktur som kan bidra til å utvikle merkevarer både i heimemarknaden og internasjonalt.

Om Norway’s best Group AS

Norway’s best Group AS (NBG) er eit leiande norsk reiselivskonsern, med nokre av Norges mest spektakulære natur- og kulturbaserte reiseopplevingar i sin portefølje. Konsernet har sitt hovudkontor i Flåm, og kontorstader i Myrkdalen, på Voss, i Bergen og Narvik. NBG har ein nasjonal ambisjon og er ein konsolidator i norsk reiseliv.

NBG er i front på heilskapleg reisemålsutvikling, og har i dag ei verksemd bygd på heilårssatsingar i Flåm, Myrkdalen og Narvik. I over 25 år konsernet posisjonert Flåm, med Flåmsbana og Nærøyfjorden, til å bli eit av Norges mest populære reisemål. I pudderparadiset Myrkdalen, med Myrkdalen Fjellandsby, finn vi den største skidestinasjonen på Vestlandet. I nord eig konsernet Narvikfjellet i Narvik og verdens nordlegaste dyrepark Polar Park i Bardu. Selskapet har i tillegg aktivitet i Aurland, Lærdal, Geiranger, Bergen og Oslo.

Selskapet har ein stor kommersiell avdeling som marknadsfører og selger eigne og andre aktørar sine attraktive produkt til gjester over heile verda.

NBG har ein omsetning på vel 850 MNOK, meir enn 500 heilårs- og deltidsansatte og 2 millionar gjester årleg. Utover reisemålssatsinga eig NBG-konsernet også det innovative selskapet The Fjords, som tilbyr unike nullutslepps reiseopplevingar på norske fjordar, og 50% av den spektakulære Flåmsbana.